नेपालगन्ज । नेपालगन्ज र त्सस आसपासका काठमिलहरुबाट लुकाएर राखिएको ठुलो परिमाणको अबैध काठ बरामद गरिएकोे छ । नेपालगन्ज आसपासका विभिन्न तीन वटा काठ मिलमा छापा मारेको डिभिजन वन कार्यालय बाँकेले ठु्लो परिमाणको सालको चिरान काठ र खयरका गोलिया बरामद गरेको हो ।
काठमिलहरुबाट झण्डै २५० क्युफुट काठ बरामद भएको सवडिभिजन वन कार्यालय राँझाका सहायक डिभिजनल वन अधिकृत नारायण पार्धेले जानकारी दिए । उनका अनुसार विभिन्न ठाउँबाट अवैध काठ ओसारपसार गरी चिरानका लागि जिल्लामा रहेका सःमिलमा राखेको भन्ने सूचनाका आधारमा बाँकेका तीन वटा मिलमा छापा मारेर अवैध काठ बरामद गरिएको हो ।
कार्यालयबाट अनुगमनमा खटिएको टोलीले १९१.७८ क्यूफुट अवैध सालको चिरान काठ र ५१.०२ क्यूफुट अवैध खयरको गोलिया बरामद गरेको कार्यालयले जनाएको छ । मङ्गलबार बाँकेको नेपालगञ्ज उपमहानगरपालिका २०, राँझास्थित मनकामना सःमिलबाट ९४ थान सालको ५१.८२ क्यूफुट चिरान काठ र जानकी गाउँपालिका ६, पिप्रहवास्थित शिवशङ्कर सःमिलबाट १ सय ४९ थान सालको १ सय ३३.९६ क्यूफुट चिरान काठ बरामद गरिएको पार्धेले जानकारी दिए ।
त्यसैगरी बुधवार बिहान जानकी गाउँपालिका ३, मानपुरस्थित जनता सःमिल प्रालिबाट ५६ थान खयर गोलियाको ५१.०२ क्यूफुट काठ बरामद गरिएको उनले बताए ।
बरामद गरिएका सबै काठहरु डिभिजन वन कार्यालय बाँकेमा राखिएको छ। बरामद गरिएका काठ र त्यसमा संलग्न व्यक्तिका बारेमा थप अनुसन्धान थालिएको पार्धेले बताए ।
प्रतिक्रिया