टिकटक प्रतिबन्ध विरुद्धको रिट निवेदनमाथि आज सुनुवाइ हुने

काठमाडौं । सामाजिक सञ्जाल टिकटकमाथि प्रतिबन्ध लगाउने सरकारको निर्णय विरुद्ध परेको मुद्दाको आजदेखि सर्वोच्च अदालतमा सुनुवाइ हुँदैछ । टिकटक विरुद्ध परेको एक दर्जन रिट निवेदनमाथि सर्वोच्च अदालतमा एकसाथ सुनुवाइ गर्ने तयारी भएको बताइएको छ ।

निवेदकहरुले अन्तरिम आदेशबाट सरकारको निर्णय खारेज गर्न माग गरेपनि अन्तरिम आदेश दिन अस्विकार गरेको अदालतको एकल इजलासले मुद्दालाई प्राथमिकतामा राख्दै आजका लागि सुनुवाइको मिति तोकेको थियो ।

सरकारका अधिकारीहरुले भने टिकटकबाट सामाजिक सद्भाव बिथोलिएको र मर्यादामा आँच आएकाले प्रतिबन्धको निर्णय गर्नुपरेको दावी गर्दै आएका छन् ।

सम्पादकहरुसँगको प्रधानमन्त्री प्रचण्डले सोमबार गरेको छलफलका क्रममा उनले प्रतिबन्धमाथि पुनर्विचार गर्न सकिने संकेत गरेका थिए ।