संसदीय दलहरू असफल र बदनाम हुदै जाँदा जनतामा निराशा : विप्लव

दाङ । नेपाल कम्युनिस्ट पार्टीका महासचिव नेत्रविक्रम चन्द विप्लव सीले अस्थायी र अस्थिर रङ्गमञ्चको राजनीतिले मुलुक नफेरिने बताएका छन् । नेपाली राजनीति अस्थिरता तर्फ धकेल्न अन्तर्राष्ट्रिय प्रयास बढ्दै गएको बताउदै विप्लवले त्यसको सशक्त प्रतिवाद जरुरी रहेको बताए ।

नेकपा दाङले देउखुरीमा आयोजना गरेको सर्वपक्षीय अन्तरक्रिया तथा भेटघाट कार्यक्रमलाई सम्बोधन गर्दैन महासचिव विप्लवले दलहरूले जनताको भावना समेट्न नसक्दा मुलुक अस्थिरता तर्फ धकेल्न खतरा बढेको बताए । संसदीय दलहरू असफल र बदनाम हुदै जादा जनतामा निराशा बढेको बताउदै विप्लवले यसको समाधान समाजवादी व्यवस्थाबाट मात्रै हुने दाबी गरे ।

विप्लवले राज्य संयन्त्रको नेतृत्व नै भ्रष्टाचारको केन्द्र भएको बताए । राज्य संयन्त्रको भुमिकामा रहेकाहरु दिनप्रतिदिन भ्रष्टाचार र अनियमिततामा संलग्न हुदै गएको समेत उनले बताए ।

लोकतान्त्रिक गणतन्त्रले केही उपलब्धि दिएपनि त्यसलाई संस्थागत गर्न संसदीय दलहरू असफल भएको बताउदै उनले उल्टो उपलब्धि उल्टाउने प्रयास गरिएको दाबी गरे ।

उनले क्रान्तिकारी र समाजवादी आन्दोलनले मात्रै राष्ट्रिय समस्या समाधान दिने भन्दै अस्थिर र अस्थायी रङ्गमञ्चले मुलुकले निकास नपाउनेमा विश्वस्त हुन अपिल गरे ।