दलाल, भ्रष्ट र विचौलियाहरुसँग केपी ओलीको साँठगाँठ छ : भीम रावल

काठमाडौं । नेकपा एमालेबाट हालसालै निष्कासित नेता डा. भीम रावलले प्रधानमन्त्री केपी शर्मा ओलीको नेतृत्वमा देशमा सुशासन हासिल हुन्छ भन्नु हास्यास्पद भएको दाबी गरेका छन् ।

एमालेले सदस्यता खोसेपछि पहिलोपटक राजधानीमा पत्रकार सम्मेलन गर्दै नेता रावलले यस्तो बताएका हुन् । उनले ओलीले भ्रष्ट र दलालहरुसँग साँठगाँठ गरेको आरोप लगाए ।

रावलले प्रश्न गरे, ‘प्रतिक्रियावादी, देशद्रोहीहरु, भ्रष्ट, अनैतिक, विचौलिया र दलालहरूसँग साँठगाँठ गर्ने ओलीले देशमा सुशासन र समाजवाद ल्याउन खोजेको भनेर आम मानिसले पत्याइदिनुपर्ने ?’

रावलले ओलीले भ्रष्टाचार काण्डहरूमा ठूला भनिएकाहरूलाई जोगाउने काम गरिरहेको आरोप पनि लगाए ।

रावलले ओलले आफ्नो निर्णयविरुद्ध प्रश्न उठाउने र देशभक्तहरुलाई निरंकुश शैलीमा हटाउन थालेको बताए । ओलीले निरंकुश र अन्यायपूर्ण ढंगले सदस्यता नै खाइदिएपछि आफु देश र जनताको हितका लागि नयाँ विकल्पमा हिँड्न बाध्य भएको रावलले स्पष्ट गरे ।

रावलले राष्ट्रिय स्वाधीनता, स्वाभिमान र जनजिविकाको पक्षमा झण्डा उठाउन सधैं अग्रसर भएको दाबी गरे ।