यो सरकार चुनावसम्म गएमै माओवादीलाई फाइदा हुन्छ : प्रचण्ड

तुलसीपुर । नेपाल कम्युनिष्ट पार्टी (माओवादी केन्द्र)का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ ले आफू जनताका पीरमर्का बुझ्न जनतामाझ गइरहेको बताएका छन् ।

प्रेस सेन्टर दाङले शनिबार घोराहीमा आयोजना गरेको पत्रकार भेटमा अध्यक्ष प्रचण्डले आफु देशभर घुम्दै गर्दा माओवादीप्रति जनताको धारणा सकारात्मक रहेको पाएको बताए ।

उनले यो सरकार आगामी चुनावसम्म सत्तामा रहे नेकपा माओवादी केन्द्रलाई फाइदा हुने बताए। “जनताले हामीप्रति धेरै आशा गर्नुभएको छ, त्यसैले सरकार गिराउनेतिर हामी लागेका छैनौँ”, उनले भने ।

सत्तारुढ राजनीतिक दलहरुमा समस्या रहेको र माओवादी केन्द्रभित्र पनि केही त्रुटि रहेको स्वीकार गर्दै तिनलाई सच्च्याएर अगाडि बढ्ने उनले प्रतिवद्धता जनाए । उनले आगामी चुनावमा माओवादी एक्लैले प्रतिस्पर्धा गर्ने बताए । कुनै दलको बैशाखीमा नटेक्ने उनले जिकिर गरे ।