कांग्रेसको निस्कर्ष – गठबन्धन दलहरुभित्र थप समन्वय र सन्तुलन आवश्यक

काठमाडौं । नेपाली कांग्रेसले सत्तारूढ गठबन्धन दलहरुभित्र थप समन्वय र सन्तुलन आवश्यक रहेको निस्कर्ष निकालेको छ ।

सभापति शेरबहादुर देउवाको निवास बूढानीलकण्ठमा बिहीबार बसेको पदाधिकारी र पूर्वपदाधिकारी र मन्त्रीहरुको संयुक्त बैठकले गठबन्धन दलहरूभित्र समन्वय र सन्तलुन आवश्यक रहेको निस्कर्ष निकालेको हो ।

बैठकपछि संचारकर्मीहरुसँग बोल्दै प्रवक्ता प्रकाशशरण महतले सरकारका प्रस्तुती अझै राम्रो हुनुपर्छ, गठबन्धन दलहरूबीच अझै समन्वय र सन्तुलन हुनुपर्‍यो भन्ने कुरामा नेताहरुको साझा मत आएको जानकारी दिए । ‘गठबन्धन दलसँग नियुक्ति लगायतमा तालमेल मिल्नुपर्छ भन्ने कुरा साथीहरूले राख्नुभयो।’

प्रवक्ता महतका अनुसार बैठकमा समग्र राजनीतिक परिस्थिति, शिक्षक आन्दोलन र आगामी केन्द्रीय समिति बैठकलगायतका विषयमा समेत छलफल भएको छ ।

बैठकमा महामन्त्रीद्वय गगन थापा र विश्वप्रकाश शर्मा एवं नेता शेखर कोइरालाले सरकारको कामकारबाहीप्रति असन्तुष्टि जनाएका थिए । सभापति देउवाले भने प्रधानमन्त्रीसँग निरन्तर संवाद भइरहेको जनाउँदै थप समन्वयको आवश्यकताबारे कुरा राख्ने बताएका थिए ।