झापा । नेकपा (एमाले)का अध्यक्ष केपी शर्मा ओलीले केही व्यक्तिहरूले प्रधानमन्त्रीको उम्मेदवार बन्ने विषयलाई हल्का रूपमा लिएको टिप्पणी गरेका छन्।
सोमबार झापामा आयोजित कोशी प्रदेशस्तरीय नेशनल भोलिन्टियर्स फोर्स घोषणा सभालाई सम्बोधन गर्दै उनले राष्ट्रिय स्वतन्त्र पार्टी (रास्वपा)का नेता बालेन्द्र साहलाई संकेत गर्दै प्रधानमन्त्री बन्ने कुरा बच्चाले जस्तै कल्पना गरेर नहुने बताएका हुन्।
अध्यक्ष ओलीले प्रधानमन्त्री बन्न स्पष्ट दृष्टिकोण र योजना आवश्यक पर्ने उल्लेख गरे। उनले भने, “बच्चालाई ठूलो भएर के बन्छस् भनेर सोध्यो भने प्रधानमन्त्री वा राष्ट्रपति भन्छ। केही मानिसहरू पनि त्यस्तै शैलीमा प्रधानमन्त्री बन्ने कुरा गरिरहेका छन्।” उनले आफूहरू भने भिजनसहित अघि बढेको दाबी गरे।
आगामी प्रतिनिधि सभा निर्वाचनका लागि एमालेले ओलीलाई प्रधानमन्त्रीको उम्मेदवार बनाएको छ। रास्वपाले बालेन्द्र शाहलाई तथा नेपाली कांग्रेसले गगन थापालाई प्रधानमन्त्रीको उम्मेदवार घोषणा गरिसकेका छन्। यस सन्दर्भमा ओलीले प्रधानमन्त्री बन्ने विषय गम्भीर जिम्मेवारी भएको बताए।
ओलीले आफूले सरकार छाडेपछि देश ‘ड्राइभरबिनाको गाडीजस्तो’ बन्ने जिकिर गरे। उनले आफ्नो नेतृत्वमा सरकार बनेपछि व्यापक काम हुने र त्यो देखेर विरोधीहरू आत्तिने दाबी गरे।
“मैले काम सुरु गरेपछि व्यापक परिणाम देखिन्छ। त्यसपछि विरोधीहरू मात्र होइन, भूमिगत गिरोहसमेत थर्कमान हुन्छन्,” ओलीले भने, “त्यसैले काम रोक्न मलाई सरकारबाट हटाइन्छ। काम बन्द हुन्छ, फेरि म आउनुपर्ने अवस्था सिर्जना हुन्छ।”
ओलीले आगामी निर्वाचन निष्पक्ष र स्वतन्त्र वातावरणमा सम्पन्न हुनुपर्नेमा जोड दिए। मतदाताले कुनै दबाबबिना मतदान केन्द्रसम्म पुगेर स्वतन्त्र रूपमा मत खसाल्न पाउनुपर्ने उनको भनाइ थियो।
“चुनाव निष्पक्ष हुनुपर्छ। मतदाताले स्वतन्त्र रूपमा मतदान गर्न पाउनुपर्छ। यसमा नेकपा एमाले सधैं अडिग छ,” उनले भने।
साथै, उनले कुनै पनि मतदान केन्द्रमा बुथ कब्जा गर्ने प्रयास नगर्न सबैलाई सचेत गराए।
प्रतिक्रिया