काठमाडौं । बैंकिङ प्रणालीमा तरलता अधिक भएपछि नेपाल राष्ट्र बैंकले बजारबाट ४० अर्ब रुपैयाँ निक्षेप संकलन गर्ने निर्णय गरेको छ। केन्द्रीय बैंकले ८८ दिन अवधिको निक्षेप संकलन उपकरणमार्फत उक्त रकम खिच्न लागेको हो।
यसका लागि बोलकबोल प्रक्रिया आजै आयोजना गरिनेछ। सहभागी हुन इच्छुक ‘क’, ‘ख’ र ‘ग’ वर्गका बैंक तथा वित्तीय संस्थाले दिउँसो ३ बजेसम्म अनलाइन बिडिङ प्रणालीमार्फत आवेदन दिनुपर्ने राष्ट्र बैंकले जनाएको छ।
राष्ट्र बैंकले बजारमा रहेको अधिक तरलता व्यवस्थापन गर्न समय–समयमा निक्षेप संकलन उपकरण प्रयोग गर्दै आएको छ। यसअन्तर्गत संकलित रकमको साँवा तथा ब्याज भुक्तानी आगामी जेठ १० गते गरिनेछ। ब्याजदर भने बोलकबोल प्रक्रियाबाटै निर्धारण हुनेछ।
बैंक तथा वित्तीय संस्थाहरूले न्यूनतम १० करोड रुपैयाँदेखि अधिकतम पाँच करोड रुपैयाँले भाग गर्दा निःशेष भाग जाने गरी निष्कासित कुल रकमबराबर बोलकबोल गर्न सक्ने व्यवस्था गरिएको छ। रकम बाँडफाँट गर्दा सबैभन्दा कम ब्याजदर प्रस्ताव गर्ने संस्थालाई पहिलो प्राथमिकतामा राखी क्रमशः वितरण गरिने राष्ट्र बैंकले स्पष्ट पारेको छ।
प्रतिक्रिया