रास्वपाको सचिवालय बैठक आज बस्दै

काठमाडौं । राष्ट्रिय स्वतन्त्र पार्टी (रास्वपा) को सचिवालय बैठक आज बस्दैछ । शनिबारका लागि तय गरिएको बैठक तयारी अपुग भएको भन्दै अन्तिम समयमा आइतबारका लागि सारिएको थियो ।

पार्टी प्रवक्ता मनिष झाले दिएको जानकारी अनुसार बैठक बिहान १० बजे घण्टीघर, वनस्थली स्थित केन्द्रीय कार्यालयमा बस्नेछ ।

बैठकमा प्रतिनिधिसभा सदस्य निर्वाचनको समानुपातिकतर्फका उम्मेदवार सिफारिस सम्बन्धी विषयमा छलफल हुने कार्यसूची रहेको छ । साथै पार्टीका वरिष्ठ नेता बालेन्द्र शाहलाई संसदीय दलको नेता बनाउने लगायत समसामयिक राजनीतिक विषयमा पनि छलफल हुने जनाइएको छ ।

हालै सम्पन्न प्रतिनिधिसभा सदस्य निर्वाचनमा रास्वपाले प्रत्यक्षतर्फ १२५ सिट जितेको छ भने समानुपातिकतर्फ ५७ सिट प्राप्त गरेको छ । उक्त सिटका आधारमा समानुपातिक सांसदको नाम टुंग्याउने तयारी पार्टीले गरिरहेको छ ।