नेपालगन्ज । बाँकेको खजुराबाट प्रहरीले ठुलो परिमाणमा लागु औषध ब्राउन सुगरसहित १ जनालाई पक्राउ गरेको छ । खजुरा ६ स्थित प्रतिक्षालय क्षेबबाट प्रहरीले २७५ ग्राम ब्राउनसुगर सहित १ जनालाई पक्राउ गरेको हो ।
इलाका प्रहरी कार्यालय धनौली र लागु औषध नियन्त्रण ब्यूरो नेपालगन्जको टोलिले खजुराबाट लागुऔषधको कारोबारेलाई पक्राउ गरेको बाँके प्रहरी प्रमुख प्रहरी उपरीक्षक अंगुर जीसीले जानकारी दिए ।
पक्राउ पर्नेमा बाँके खजुरा गाँउपालिका ५ का २६ वर्षिय अजिजुल रहमान खाँ रहेका छन् । प्रहरीका अनुसार पक्राउ परेका खाँबाट ७ थान मोबाईल, भारतीय नम्बर प्लेटको थार गाडी र ७० हजार ९ सय रुपैयाँ प्रहरीले बरामद गरेको छ ।
पक्राउ परेका खाँले लामो समयदेखि खजुराको प्रतिक्षालय र गोदहाना क्षेत्रमा बसेर नेपालगन्जका लागु औषधसेवन कर्ताहरुलाई लागु औषध सप्लाई गर्ने गरेको स्थानीयले बताउँदै आएका थिए । गोप्य सूचनाका आधारमा कारोबार स्थलमै पुगेर प्रहरीले खाँलाई ठुलो परिमाणको लागुऔषध सहित पक्राउ गरेको एसपी जीसीले बताए ।
पक्राउ परेका खाँलाई अदालतबाट म्याद मागेर अनुसनधान सुरु गरिने प्रहरीले जनाएको छ ।
प्रतिक्रिया