काठमाडौं । ओपनर कुशल भुर्तेलको शानदार शतकीय इनिङको मद्दतमा नेपालले आईसीसी क्रिकेट विश्वकप लिग-२ अन्तर्गत अमेरिकाविरुद्ध शानदार जित निकालेको छ ।
शनिबार कीर्तिपुरस्थित त्रिवि क्रिकेट मैदानमा अमेरिकाले दिएको १९६ रनको लक्ष्य नेपालले ३६.४ ओभरमा एक विकेट गुमाएर पूरा गरेको हो ।
नेपालको जितमा तीन खेलपछि प्लेइङ-११ मा पुनरागमन गरेका कुशल भुर्तेलले निर्णायक भूमिका खेले । उनले ११८ बलमा १३ चौका र ४ छक्कासहित १२० रनको उत्कृष्ट शतकीय पारी खेले । एकदिवसीय अन्तर्राष्ट्रिय क्रिकेटमा भुर्तेलको यो दोस्रो शतक हो ।
यसअघि उनले सन् २०२३ मा लिग-२ अन्तर्गत नामिबियाविरुद्ध ११५ रन बनाउँदै पहिलो शतक प्रहार गरेका थिए ।
भुर्तेलले ओपनर आशिफ शेखसँग पहिलो विकेटका लागि १४५ रनको शतकीय साझेदारी गरेका थिए । आशिफले ७२ बलमा ८ चौकासहित ५८ रन बनाए । २६.३ ओभरमा आशिफ आउट भएपछि उक्त साझेदारी टुटेको थियो ।
नेपालका लागि एकदिवसीय अन्तर्राष्ट्रियमा डेब्यु गरेका इशान पाण्डेले अविजित २० रन बनाए ।
यसअघि टस जितेर ब्याटिङ गरेको अमेरिकाले ४३.३ ओभरमा सबै विकेट गुमाउँदै १९५ रन बनाएको थियो ।
अमेरिकाका लागि ओपनर स्मित पटेलले ८९ बलमा ८ चौका र ३ छक्कासहित ८३ रन बनाए । उनले शेहन जयसूर्यासँग दोस्रो विकेटका लागि १०० रनको साझेदारी गरेका थिए ।
जयसूर्याले ५२ बलमा ५ चौका र १ छक्कासहित ५० रन बनाए । २२.४ ओभरमा उनी आउट भएपछि शतकीय साझेदारी टुटेको थियो ।
मिलिन्द कुमार २८ रनमा अविजित रहे भने हर्मित सिंहले १४ रन बनाए । अन्य ब्याटरले दोहोरो अंकमा रन जोड्न सकेनन् ।
नेपालका लागि दीपेन्द्रसिंह ऐरी सर्वाधिक सफल बलर बने । उनले ७.३ ओभरमा २४ रन खर्चेर ४ विकेट लिए । सोमपाल कामीले २ विकेट लिए भने सन्दीप लामिछाने र गुल्सन झाले १-१ विकेट लिए ।
यस जितसँगै नेपालले शृंखलामा पहिलो जित दर्ता गरेको छ । लिग-२ मा नेपालको यो नवौँ जित हो । नेपालले २६ खेलमा ९ जित, १५ हार र २ खेल रद्द हुँदै २० अंक जोडेको छ ।
लगातार दोस्रो हार व्यहोरेको अमेरिका भने ३६ अंकसहित तालिकाको दोस्रो स्थानमा कायम छ । अमेरिकाले २६ खेलमध्ये १८ जित र ८ हार व्यहोरेको छ । गत बिहीबार स्कटल्यान्डसँग अमेरिका डीएलएस प्रणालीका आधारमा २ रनले पराजित भएको थियो ।
प्रतिक्रिया