काठमाडौं । पर्साको वीरगञ्ज महानगरपालिकाका मेयर राजेशमान सिंहविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ।
आयोगले सोमबार विशेष अदालत काठमाडौंमा आरोपपत्र दायर गर्दै सिंहसहित सात जनाविरुद्ध मुद्दा चलाएको जनाएको छ।
अख्तियारका अनुसार मेयर सिंहले गलत विवरण पेश गरी भट्टराई थर भएकी एक महिलाकी छोरीलाई आफ्नै छोरी ‘रुबीना श्रेष्ठ’ का रूपमा देखाएर नेपाली नागरिकताको प्रमाणपत्र दिलाएको आरोप लागेको छ।
यस प्रकरणमा वीरगञ्ज महानगरपालिका वडा नम्बर ३ का तत्कालीन वडा सचिव भिखारी राय, तत्कालीन वडा सदस्य तथा कावा वडाध्यक्ष तुफैल अख्तर ठकुराई, जिल्ला प्रशासन कार्यालय पर्साका तत्कालीन प्रशासकीय अधिकृत षडकुमार पोखरेल, गृह मन्त्रालयका तत्कालीन उपसचिव पुष्कर राना, शाखा अधिकृत परशुराम पोखरेल तथा सिन्धुपाल्चोकको इन्द्रावती गाउँपालिका-१० निवासी रिता भट्टराईविरुद्ध पनि मुद्दा दायर गरिएको आयोगले जनाएको छ।
आयोगले नागरिकता प्राप्तिका क्रममा झुटा विवरण तथा कागजात प्रयोग गरिएको निष्कर्षसहित उनीहरूमाथि भ्रष्टाचारसम्बन्धी कसुरमा कारबाहीको माग गर्दै विशेष अदालतमा अभियोग दर्ता गरेको हो।
उक्त मुद्दामाथि अब विशेष अदालतमा सुनुवाइ हुने छ।
प्रतिक्रिया