सूचना प्राप्तिको माध्यम सामाजिक सञ्जाल मात्र बनाउने प्रवृति घातक

काठमाडौं । श्रमजीवि सञ्चारकर्मीहरुको पहलमा संघीय राजधानी काठमाडौं र लुम्बिनी प्रदेशको आर्थिक राजधानी बुटवलबाट एकैदिन कार्यालय सञ्चालन गरी संज्ञान मिडिया प्रालीको व्यानरमा सुरु भएको खबरकुरा डटकम चारवर्षको पुगेको छ । आज हामी पाँचौं वर्षमा प्रवेश गरेका छौं । कैयौं संकट र चुनौतीका बीचबाट पनि चार वर्ष पुरा गर्न पाएको खुशी हाम्रा पाठक, विज्ञापनदाता, सहयोगी, शुभचिन्तकहरुलाई साट्न पाउँदा हामी हर्षित छौं । पाँचौं वर्ष प्रवेशको अवसरमा हामीलाई साथ सहयोग र माया गर्ने देश विदेशमा रहनुभएका आम पाठकप्रति नमन व्यक्त गर्न चाहन्छौं । यहाँहरुले हामीप्रति दर्शाउनु भएको विश्वास, माया, सद्भावले नै हामीलाई निरन्तर अघि बढ्ने हौसला प्रदान गरेको छ । यो हौसलालाई कायमै राख्ने प्रतिवद्धता जनाउँछौं ।

आजको युगमा आम जनमानसमा सूचना सम्प्रेषणका लागि कैयौं माध्यमहरु सक्रिय छन् । हाते प्रेसबाट सुरु भएको नेपालको पत्रकारिता छापा माध्यम, टेलिभिजन रेडियो हुँदै तिब्र गतिको अनलाइन माध्यमबाट संचालन भैरहेको छ । आम संचारको नविनतम माध्यम रहेको अनलाइनलाई अझ बढी पठनीय र विश्वसनीय बनाउने काम यसका संचालकहरुको हो । यसमामिलामा खबरकुराले आफ्नो धर्म सधैं इमान्दारिताका साथ निर्वाह गर्दैआएको र भविष्यमा पनि यसै आदर्शमा कायम रहिरहनेछ । चार वर्षको यात्रामा समाजमा रहेका विकृति विसंगतीका विरुद्ध कलम चलाउन कहिँकतै हामी डगमगाएनौं । भ्रष्टाचार र कुशासनका विरुद्ध कलम चलाउन डराएनौ । समाज, समुदाय र मुलुक परिवर्तनका लागि भएका सकारात्मक पहलकदमीको प्रशंसा गर्न पनि कहिँकतै चुकेनौं । निर्भिक र तटस्थ समाचार लेख्न नडग्मगाउने हाम्रो सम्पादकीय नीतिलाई कहिल्यै कमजोर बनाएनौं । यो प्रतिवद्धता भोलि पनि कायमै रहनेछ ।

यद्यपी, संचारमाध्यम संचालनका लागि आजको दिन चुनौतिपूर्ण र भोलि झन बढी चुनौती थपिँदै जाने निश्चित छ । एकातिर राज्यसंयन्त्रको दुरुपयोग गर्दै संचारमाध्यममाथि आक्रमणका घटना बढ्दै गएका छन् । सार्वजनिक सूचना प्राप्तिको माध्यम सामाजिक सञ्जाललाई मात्र बनाउने र त्यसमै मात्र विश्वास गर्ने प्रवृतिको समेत विकास हुँदैछ । यी दुवै प्रवृति वास्तविक संचार माध्यमका लागि घातक बन्दै गएका छन् । नियमन भन्दा बाहिर रहेको सामाजिक सञ्जालबाट प्रेषित हुने सही सूचना भन्दा पनि अफवाह र गलत खबरले निम्त्याउने खतराले सिंगो समाजलाई नै दुषित बनाउने अवस्था समेत रहन्छ । भीडको मनोविज्ञानले निर्देशित गर्ने भाष्यलाई साझा गर्दा समाज सकारात्मक भन्दा नकारात्मक प्रतिक्रियाको मुडमा पुग्ने अवस्था आउँछ । यस्तो, अवस्थामा निर्भिक र निडरताका साथ सत्य, तथ्य र तार्किक समाचार सम्प्रेषण गर्नु चुनौतिपूर्ण रहन्छ । अर्कोतिर, सिंगो देशको अर्थतन्त्र कमजोर बन्दा त्यसको प्रत्यक्ष मारमा समेत संचारमाध्यमहरु परिरहेको अवस्था छ । यद्यपी सबैखाले चुनौतीहरुबाट हामीलाई बचाइराख्न आदरणीय पाठक र विज्ञापनदाताहरुको सहयोग अतुलनीय छ ।

भीडको मनोविज्ञानबाट तय गरिने सूचनाबाट जोगिँदै पाठकलाई सत्य, निष्पक्ष र विश्वसनीय सामग्री दिलाउनु नै हाम्रो मूल लक्ष्य हो । हामी सधैंभर रचनात्मक प्रतिपक्षको भूमिकामा रहने पुनः प्रतिवद्धता जनाउन चाहन्छौं ।

अन्त्यमा, आज जेठ १५ । संघीय गणतन्त्र स्थापना भएको दिन अर्थात लोकतान्त्रिक आन्दोलनको उत्कर्षको दिन । लाखौं जनताको सहभागिता र हजारौं जनताको वलिदानी संघर्षबाट नेपालमा गणतन्त्र स्थापना भएको थियो । हामी गणतन्त्र दिवसको अवसरमा हाम्रा पाठक, विज्ञापनदाता, शुभचिन्तकहरुप्रति शुभकामना समेत व्यक्त गर्न चाहन्छौं ।