काठमाडौं। राजावादी आन्दोलनका क्रममा हिंसा भड्काउने अभियोगमा पक्राउ परेका दुर्गा प्रसाईंलाई धरौटीमा रिहा गर्ने उच्च अदालत पाटनको आदेशविरुद्ध महान्यायाधिवक्ता कार्यालयले सर्वोच्च अदालत जाने भएको छ । उच्चको आदेशप्रति असहमति जनाउँदै महान्यायाधिवक्ता कार्यालय सर्वोच्च जान लागेको हो ।
उच्च अदालतका न्यायाधीशहरू टंकप्रसाद गुरुङ र डिल्लीरत्न श्रेष्ठको संयुक्त इजलासले सोमबार मात्रै प्रसाईंलाई तीन लाख रुपैयाँ धरौटीमा रिहा गर्ने आदेश दिएको थियो।
प्रसाईं गत चैत १५ गते काठमाडौंको तीनकुनेमा भएको प्रदर्शनसँग सम्बन्धित घटनामा संलग्न रहेको अभियोगमा पक्राउ परेका थिए । त्यसअघि उनलाई जिल्ला अदालत काठमाडौंले पुर्पक्षका लागि थुनामा पठाउने आदेश दिएको थियो ।
अदालतको आदेश मुलुकी फौजदारी कार्यविधि संहिता २०७५ को मर्मविपरीत रहेको महान्यायाधिवक्ता कार्यालयले निस्कर्ष निकालेको छ। प्रसाईंमाथि कर्तव्य ज्यान, ज्यानमार्ने उद्योग, राज्यविरुद्धको अपराध, आपराधिक उपद्रव तथा संगठित अपराधसम्बन्धी मुद्दा दायर भएको छ।
प्रतिक्रिया