नेपालगन्जमा ३५ वर्षीया कोरोना संक्रमित महिलाको मृत्यु

नेपालगन्ज । बाँकेमा थप एक जना कोरोना संक्रमितको मृत्यु भएको छ ।

नेपालगन्ज उपमहानगरपालिका वडा नं. १ धम्बोजी घर भएका ३५ वर्षीय महिलाको उपचारकै क्रममा मृत्यु भएको जिल्ला सीसीएमसीले जनाएको छ ।

स्वास्थ्यमा समस्या उत्पन्न भै गत असोज २ गते भेरी अस्पतालको प्रि-आइसोलेसन वार्डमा भर्ना भएकी ती महिलालाई कोरोनाको आशंकामा सोही दिन नै स्वाब संकलन गरिएको थियो ।

३ गते कोरोना पोजेटिभ रिपोर्ट आएसँगै उनलाई कोभिड आइसोलेसन वार्डमा भर्ना गरी उपचार सुरु गरिएको थियो ।

उपचारको क्रममा उनलाई एन्टिबायोटिक, रेमडेसिभिर लगायत सीपीएपी/भेन्टिलेटरमा राखिएको थियो । सबैप्रकारको उपचार पद्दती अपनाउँदा पनि उनको बुधबार दिउँसो २१५ मा मृत्यु भएको भेरी अस्पतालले जनाएको छ ।

उनी केही समयदेखि मधुमेह, उच्च रक्तचाप, हाइपोथाइरोडिज्मको बिरामी समेत रहेको अस्पतालले जनाएको छ ।

यससँगै बाँकेमा हालसम्म कोरोना संक्रमणबाट मृत्यु हुनेको संख्या १६ पुगेको छ ।