बुटवल । टिभिएस मोटर कम्पनीले नेपाली बजारमा नयाँ विद्युतीय स्कुटर ‘टिभिएस अर्बिटर’ सार्वजनिक गरेको छ । नेपालका लागि आधिकारिक वितरक जगदम्बा मोटर्सले ल्याएको उक्त स्कुटर आइतबार बुटवलमा सार्वजनिक गरिएको हो ।
नेपाल अटो ट्रेड युनियनका अध्यक्ष कृष्ण घिमिरेले स्कुटर सार्वजनिक गर्दै अर्बिटरको आगमनले दिगो तथा स्वच्छ यातायात प्रवर्द्धनमा योगदान पुग्ने विश्वास व्यक्त गरे । आधुनिक प्रविधि, आकर्षक डिजाइन तथा दैनिक प्रयोगलाई ध्यानमा राखेर निर्माण गरिएको स्कुटरले नयाँ पुस्ताका ग्राहकको विश्वास जित्ने उनको भनाइ थियो ।
अर्बिटरको नेपाली बजार मूल्य २ लाख ८१ हजार ९ सय रुपैयाँ तोकिएको छ । विद्युतीय स्कुटरका बिक्री तथा सेवा प्रमुख सुशान्त आचार्यले दैनिक सहरी यात्रालाई सहज र दिगो बनाउने उद्देश्यले स्कुटर नेपाली बजारमा ल्याइएको बताए । उनका अनुसार स्कुटरले एकपटक पूर्ण चार्ज गर्दा १५८ किलोमिटरसम्म यात्रा गर्न सक्नेछ ।
टिभिएसको यस क्षेत्रको आधिकारिक विक्रेता बालाजी अटोमोबाइल्सका प्रबन्ध निर्देशक विशाल जैसवालले अर्बिटरले नेपालको दुईपाङ्ग्रे विद्युतीय सवारी बजारलाई थप बलियो बनाउने बताए । उनले स्कुटरले सहरी यात्राको अनुभवलाई नयाँ ढङ्गले परिभाषित गर्ने दाबी गरे ।
स्कुटरमा ३.१ किलोवाट-घण्टाको ब्याट्री र १६९ मिलिमिटरको ग्राउन्ड क्लियरेन्स रहेको छ । १४ इन्चको अगाडिको पाङ्ग्रा, दुईवटा हेल्मेट राख्न मिल्ने ३४ लिटर क्षमताको सिटमुनिको भण्डारण, ८४५ मिलिमिटर लामो सिट तथा २९० मिलिमिटरको समतल फुटबोर्ड यसको प्रमुख विशेषता हुन् ।
अर्बिटरमा मोडअनुसारको नेभिगेसन, कल तथा एसएमएस सूचना, प्रत्यक्ष स्थान पहिचान, भौगोलिक सीमाङ्कन तथा सफ्टवेयर अद्यावधिक सुविधा उपलब्ध छ । डिजिटल एलसिडी क्लस्टर तथा मोबाइल एपसँगको जडान सुविधासमेत रहेको कम्पनीले जनाएको छ ।
त्यस्तै, स्कुटरमा क्रुज कन्ट्रोल, उकालोमा रोकिँदा सहायक प्रणाली, पार्किङ सहायता तथा पुनःऊर्जा सङ्कलन गर्ने ब्रेकिङ प्रणालीसहित ‘इको’ र ‘पावर’ मोड उपलब्ध छन् । कार्यक्रमको सञ्चालन पत्रकार सुमन श्रेष्ठले गरेका थिए ।
प्रतिक्रिया