काठमाडौं । नेपालमा कोरोना संक्रमितको संख्या दिनदिनै बढ्न थालेको छ । छिमेकी भारतमा संक्रमितहरु तिब्र गतिमा बढेसँगै नेपालमा पनि संक्रमितहरु बढ्न थालेका हुन् । बुधबार ३ सय ३९ जना कोरोना संक्रमित थपिएका छन्।
चार हजार एक सय पीसीआर परीक्षण र एक हजार ४० एन्टिजेन परीक्षण गर्दा ती संक्रमितहरु थपिएको स्वास्थ्य तथा जनसंख्या मन्त्रालयले आयोजना गर्ने नियमित कोरोना ब्रिफिङ कार्यक्रममार्फत जनाएको छ । मन्त्रालयका प्रवक्ता प्राडा जागेश्वर गौतमका अनुसार पीसीआर परीक्षणको क्रममा २ सय ९८ जनामा संक्रमण पुष्टि भएको थियो । यस्तै एन्टिजेन विधिबाट ४१ जनामा संक्रमित पुष्टि भएको थियो ।
गौतमले काठमाडौं उपत्यकामा मात्रै गएको २४ घण्टामा १६३ जनामा संक्रमण पुष्टि भएको बताए । जसमध्ये काठमाडौंमा १३२ जना, ललितपुरमा २६ जना र भक्तपुरमा ५ जना रहेका छन् ।
यससँगै बुधरबारसम्म देशभर सक्रिय संक्रमितको संख्या दुई हजार २०१ पुगेको छ। प्रवक्ता गौतमका अनुसार देशभर ६५ जना आईसीयू र १३ जना भेन्टिलेटरमा उपचाररत छन्।
पछिल्लो २४ घण्टामा ७४ जना संक्रमित निको भएर घर फर्किएका छन्।
प्रतिक्रिया