बाँकेमा उपचाररत ४ जना कोरोना संक्रमितको उपचारका क्रममा मृत्यु

नेपालगन्ज । बाँकेको २ वटा अस्पतालमा उपचाररत ४ जना कोरोना संक्रमितको मृत्यु भएको छ । नेपालगन्ज मेडिकल कलेज कोहलपुरमा २ जना र भेरी अस्पताल नेपालगन्जमा उपचाररत २ जना संक्रमितको फरक फरक समयमा मृत्यु भएको हो ।

डीसीएमसी बाँकेका अनुसार जेठ ६ गते मेडिकल कलेज कोहलपुर भर्ना भएका स्वर्गद्वारी प्युठानमा ६० वर्षिय पुरुषको आईतबार राती ८ः४५ मा मृत्यु भएको छ भने जेठ २१ गते भर्ना भएका शारदा १३ सल्यानका ५५ वर्षिय पुरुषको आज बिहान ७ बजे मृत्यु भएको छ । त्यसैगरि जेठ १९ गते भेरी अस्पतालमा भर्ना भएका बंगलाचुली ३ दाङका ५२ वर्षिय पुरुषको आईतबार राती ७ः५० बजे मृत्यु भएको थियो भने हिजै भेरी अस्पताल भर्ना भएका मुसिकोट ७ रुकुम पश्चिमका ६३ वर्षिय पुरुषको पनि आईतबार राती ८ः३० बजे मृत्यु भएको छ ।

यो मृत्युसँगै बाँकेमा उपचाररत जिल्ला बाहिरका ३१७ जना र जिल्ला भित्रका ३०२ जनाको उपचारका क्रममा मृत्यु भएको बाँकेका कोरोना फोकलपर्शन तेज ओलीले जानकारी दिए ।