भेरी अस्पताल नेपालगन्जमा थप दुई कोरोना संक्रमित महिलाको मृत्यु

बाँके । भेरी अस्पताल नेपालगन्जमा कोरोना भाइरस संक्रमणबाट थप दुईजनाको मृत्यु भएको छ । कोरोना संक्रमणबाट बर्दियाका एक र कैलालीका एक गरी दुई महिलाको मृत्यु भएको हो ।

बर्दिया मधुवन नगरपालिका-४ की ७० वर्षीया महिलाको गएराती साढे एक बजे मृत्यु भएको जिल्ला कोभिड व्यवस्थापन केन्द्रका फोकलपर्सन तेज वलीले जानकारी दिए ।

उनका अनुसार गएको २ गते बर्दियामा पीसीआर परीक्षण जाँच गर्दा ती महिलालाई कोरोना संक्रमण पुष्टि भएको थियो । उनलाई ४ गते भेरीमा भर्ना गरिएको थियो ।

त्यस्तै कैलाली भजनी नगरपालिका-६ की ५२ वर्षीया महिलाको ७ गते नेपालगन्ज मेडिकल कलेज कोहलपुरमा गरिएको पीसीआर परीक्षणमा कोरोना संक्रमण पुष्टि भएको थियो ।

उनलाई त्यसैदिन अस्पतालमा भर्ना गरिएको थियो । गम्भीर अवस्थामा रहेकी उनको गएराती ८ बजेतिर मृत्यु भएको हो । योसँगै बाँकेमा उपचारका लागि आएका बाहिरी जिल्लाका ३ सय ९५ जनाको मृत्यु भएको छ ।