काठमाडौं । नेपाली सेना, नेपाल प्रहरी र सशस्त्र प्रहरीतर्फका गरी २ सय ८४ जना सुरक्षाकर्मीलाई कोरोना संक्रमण भएको छ ।
सरकारले स्वास्थ्यकर्मीपछि सुरक्षा अंगलाई कोरोना संक्रमणको जोखिम न्यूनीकरण तथा नियन्त्रणका लागि अग्रपंक्तिमा खटाएकामा सुरक्षाकर्मीतर्फ हालसम्म २ सय ८४ जनामा संक्रमण देखिएको हो ।
जसअनुसार तीनवटै सुरक्षा अंगका गरी हालसम्म २ सय ३० जना सुरक्षाकर्मी उपचारपछि निको भएर नियमित काममा फर्किसकेका छन् । नेपाली सेनाका प्रवक्ता सहायकरथी सन्तोषवल्लभ पौड्यालले नेपाली सेनातर्फ ७९ जनामा संक्रमण देखिएकामा आइतबारसम्म ७० जना उपचारपछि निको भएर नियमित काममा फर्किसकेको जानकारी दिए ।
उनका अनुसार नेपाली सेनातर्फ ९ जना भने उपचारकै क्रममा छन् । उनीहरूमध्ये एक जनाको सैनिक अस्पताल र बाँकीको सशस्त्र प्रहरी अस्पतालमा उपचार भइरहेको छ । ‘७९ जनामा संक्रमण देखिएकामा ७० जना उपचारपछि ड्युटीमा फर्किसकेका छन् । बाँकी ९ जनामध्ये एक जनाको सैनिक अस्पताल र बाँकीको सशस्त्र प्रहरी अस्पतालमा उपचार भइरहेको छ,’ सैनिक प्रवक्ता पौड्यालले राजधानीसँग भने यसैगरी, नेपाल प्रहरीतर्फ १ सय १९ जनामा संक्रमण देखिएकामा ९५ जना उपचारपछि नियमित ड्युटीमा फर्किएका छन् ।
प्रहरी प्रवक्ता डिआइजी निरजबहादुर शाहीका अनुसार आइतबार मात्रै प्रहरी प्रधान कार्यालय नक्सालमा कार्यरत चार जना प्रहरीमा संक्रमण देखिएको हो । उनीहरूलाई उपचारका लागि अस्पताल पठाइसकिएको र उनीहरूसँग सम्पर्कमा आएकाहरूको समेत परीक्षणको तयारी भएको शाहीले जानकारी दिएका छन् । नेपाल प्रहरीतर्फ २४ जना संक्रमितको विभिन्न अस्पतालमा उपचार भइरहेको शाहीले जनाए ।
स्रोतका अनुसार आइतबार संक्रमण देखिएका प्रहरीहरू प्रधान कार्यालको सवारी शाखामा कार्यरत रहेको बुझिएको छ । यसैगरी, सशस्त्र प्रहरी बलतर्फ हलसम्म ८६ जनामा संक्रमण पुष्टि भएकामा ६५ जना उपचारपछि काममा फर्किएका छन् । सशस्त्र प्रहरीका प्रवक्ता डिआइजी राजु अर्यालका अनुसार ६५ जना उपचारपछि निको भएर काममा फर्किएका छन् भने २१ जना उपचारकै क्रममा छन् । त्यसमध्ये २० जनाको मोरङ स्थित कोभिड अस्पताल र एक जनाको बलम्बुस्थित आफ्नै अस्पतालमा उपचार भइरहेको छ । उक्त समाचार आजको राजधानी दैनिकमा छापिएको छ ।
प्रतिक्रिया