बुटवल । २ साता अघिसम्म कोरोनाको ग्राफले उकालो लाग्ने रेकर्ड हरेकदिन ब्रेक गरिरहेको रुपन्देहीमा यो साताभने हरेक दिने ओरालो लाग्ने ग्राफले रेकर्ड ब्रेक गरिरहेको छ । रुपन्देहीमा आज कोरोना संक्रमणको दोस्रो लहर सुरुभएदेखिकै सबैभन्दा कम संख्यामा संक्रमित थपिएका छन् । पछिल्लो २४ घण्टाको अवधिमा रुपन्देहीका ४ वटा प्रयोगशालामा ८८८ नमुना परीक्षण गर्दा ५० जनामा मात्र संक्रमण पुष्टि भएको छ । सोही अवधीमा जिल्लामा १ जनाको मात्र मृत्यु भएको छ भने ३७८ जना कोरोनाबाट मुक्त भएका छन् ।
स्वास्थ्य कार्यालय रुपन्देहीका अनुसार जिल्लामा आज सबै भन्दा धेरै तिलोत्तमा नगरपालिकामा १३ संक्रमित थपिएका छन् । यसैगरी बुटवल उपमहानगरपालिका र सिद्धार्थनगर नगरपालिकामा ९।९ जना, देवदह नगरपालिकामा ५ जना, ओमसतिया गाउँपालिकामा ३ जना, सैनामैना नगरपालिका, मायादेवी गाउँपालिका, मर्चवारी गाउँपालिका, लुम्बिनी सांस्कृतिक नगरपालिकामा २।२ जना, कञ्चन गाउँपालिका र शुद्धोधन गाउँपालिकामा १।१ जना संक्रमित थपिएका छन् ।
यो सँगै रुपन्देहीमा कोरोना संक्रमित हुनेको संख्या २६ हजार ५८१ पुगेको छ । जसमध्ये २४ हजार ३३३ जना निको भएका छन । हाल जिल्लामा १ हजार ८२० जना कोरोनाका संक्रिय संक्रमितहरु रहेका छन् । रुपन्देहीमा आजसम्ममा ४३८ जना कोरोना संक्रमितको उपचारका क्रममा मृत्यु भएको छ ।
प्रतिक्रिया