काठमाडौं । नेकपा एमालेका अध्यक्ष केपी शर्मा ओलीको भ्याकेट निवेदनमाथि आज सर्वोच्च अदालतमा सुनुवाइ हुनेभएको छ ।
कर्णाली प्रदेशका चार सांसदलाई पदमुक्त गर्ने नेकपा एमालेको दशौं महाधिवेशन आयोजक कमिटीको निर्णय कार्यान्वयन नगर्न सर्वोच्चले अन्तरिम आदेश जारी गरेपछि अध्यक्ष ओली भ्याकेटमा गएका थिए । ओलीसँगै कर्णाली प्रदेशसभा सचिवालयले पनि भ्याकेट निवेदन दिएको थियो ।
अन्तरिम आदेश खारेज गर्न भ्याकेटमा गएका ओलीको निवेदनमाथि प्रारम्भिक सुनुवाइ गर्दै सर्वोच्च अदालतले अर्को पक्षलाई सूचना दिन भनेको थियो ।
न्यायाधीसद्वय विश्वम्भरप्रसाद श्रेष्ठ र नहकुल सुवेदीको इजलासमा निवेदनमाथि सुनुवाइ गरी आज सो भ्याकेटको पेशी चढेको छ ।
एमाले कर्णाली प्रदेशसभा संसदीय दलको ह्वीप उल्लंघन गरेपछि सो पार्टीका चारजना सांसद प्रकाश ज्वाला, नन्दसिंह बुढा, अमरवहादुर थापा र कुर्मराज शाहीलाई पार्टीले पदमुक्त गर्न प्रदेशसभा सचिवालयलाई पत्र पठाएको थियो । सोही पत्रका आधारमा प्रदेशसभा सचिवालयले चार सांसदको पद खारेज गरेपछि उनीहरु त्यसविरुद्ध सर्वोच्च अदालतमा गएका थिए ।
सर्वोच्चका न्यायाधीस प्रकाशिमानसिंह राउतको एकल इजलासले अन्तरिम आदेश जारी गर्दै एमालेको दशौं महाधिवेशन आयोजक कमिटी नै अवैध भएको ठहर गरेको थियो । र, सो कमिटीले गर्ने कारवाही बदर गरेर ती सांसदहरुलाई पुनर्वहाली गर्न आदेश दिएको थियो ।
एमालेले सर्वोच्चको आदेश पालना गर्दै दशौं महाधिवेशन आयोजक कमिटी भंग गरेको छ ।
प्रतिक्रिया