सुर्खेत । कर्णालीका ४ जना सांसदको पद गएको छ । सवोच्च अदालतले एमालेले दिएको भ्याकेट निवेदनको सुनुवाई गर्दै पार्टीले गरेको कारवाही सदर गरिदिएपछि ४ एमाले सांसद पद मुक्त भएका हुन् ।
एमाले अध्यक्ष केपी शर्मा ओलीको भ्याकेट निवदेनमा सुनुवाई गर्दै प्रधान न्यायाधीश चोलेन्द्र शम्शेर जबरा र न्यायाधीश प्रकाश कुमार ढुंगानाको इजलासबाट आज एमालेले गरेको कारवाहीलाई सदर गरेको थियो ।
कर्णाली प्रदेशका प्रदेशसभा सदस्यहरु प्रकाश ज्वाला, नन्दसिंह बुढा, कुर्मराज शाही र अमरबहादुर थापालाई एमालेले ह्वीप उल्लंघन गरेको भन्दै कारबाही गरेकोमा न्यायाधीश प्रकाशमान सिंह राउतको एकल इजलासले दशौं महाधिवेशन आयोजक कमिटी प्रति नै कानुनी प्रश्न उठाउँदै अन्तरिम आदेशबाट कारवाही बदर गरेको थियो । अन्तरिम आदेश खारेजीको माग गर्दै नेकपा एमालेका अध्यक्ष केपी ओलीले असार ७ मा भ्याकेट निवेदन दिएका थिए ।
यसअघि एमाले केन्द्रीय कमिटीबाट बनेको दशौ महाधिवेशन आयोजक समितिलाई केन्द्रीय कमिटी मान्न अदालतले अस्विकार गरेको थियो । केन्द्रीय कमिटीले निर्णय गरेर गठन भएको आयोजक समिति नै एमालेको आधिकारिक कार्यकारी कमिटी भएको भन्दै त्यसबाट भएको कारवाहीलाई मान्यता दिन ओलीले भ्याकेट हालेका थिए ।
प्रतिक्रिया