बुटवल । रुपन्देहीको तिलोत्तमामा नेकपा एमाले र गठबन्धन बिच रोमाञ्चित यात्रा जारी रहेको छ । अधिकांश पालिकाहरुमा मतगणना सकिएर जन प्रतिनिधिहरुले पदबहाली गरि सक्दा पनि तिलोत्तमामा भने अझैसम्म मतगणना जारी रहेको छ ।
आईतबार बिहान सम्म अग्रस्थानमा रहेका नेकपा एमालेका नगर प्रमुख पदका उम्मेदवार मोहन चापागाईंलाई पछि पार्दै गठबन्धनबाट कांग्रेस उम्मेदवार रामकृष्ण खाँणले अग्रता लिएका छन् । शनिबार सम्म पालैपालो अग्रता लिएपनि आईतबारबाट भने लगातार खाँणले अग्रता लिईरहेका छन् ।
३६ हजार १ सय ५१ मत गणना हुँदा ७ सय ५६ मतले अगाडि रहेका खाँण आज साझ ५:४५ बजे सम्म ३८ हजार ८ सय ८४ मत गणना हुँदा चापागाईंलाई ८ सय ३९ मतले पछाडि पार्दै खाँणले झन अग्रता बढाएका छन ।
पछिल्लो परिणाम अनुसार खाँणको १५ हजार २ सय ४६ मत आउँदा चापागाईंलाई १४ हजार ४ सय ७ मत प्राप्त भएको छ ।
उप प्रमुखमा भने भारी अन्तरले एमाले उम्मेदवार जागेश्वरी चौधरीले अग्रता लिएकी छन् । कांग्रेस र माओवादी केन्द्रकाबीच गठबन्धन भएपनि गठबन्धनबाट उठेका माओवादी केन्द्रका उम्मेदवार हेमराज शर्माले चुनावी तालमेल अनुसार मत नपाएको परिणामले देखाएको छ । चौधरीको १४ हजार ५४ मत आउँदा शर्माको ७ हजार २ सय १ मत मात्र आएको छ ।
प्रतिक्रिया