प्रहरीमाथि हातपात गरेको अभियोगमा पक्राउ

काठमाडौं । काठमाडौंको चन्द्रागिरीमा ड्यूटीमा खटिएका प्रहरीमाथि हातपात गरेको आरोपमा १ जना स्कुटर चालक पक्राउ परेका छन् ।

चन्द्रागिरी नगरपालिका-३ थानकोट बसपार्कस्थित ड्यूटीमा खटिएका प्रहरीमाथि हातपात गरेको आरोपमा सर्लाहीको मलंगवा नगरपालिका-६ घर भइ काठमाडौंको चन्द्रागिरी नगरपालिका-३ खरिबोट बस्ने २६ वर्षीय अनमोल रामलाई आइतबार राति प्रहरीले पक्राउ गरेको हो ।

उक्त स्थानमा प्रहरी वृत्त थानकोट र ट्राफिक प्रहरी प्रभाग थानकोटबाट खटिएको प्रहरीले जाँच गर्ने क्रममा नागढुंगाबाट आउँदै गरेको बा ५७ प ५९४६ नम्बरको स्कुटर चालक रामले प्रहरीमाथि हातपात गरेका थिए ।

रामको हातपातबाट प्रहरीको १ थान हेण्ड सेट (वाकिटकी) मा समेत क्षति पुगेको प्रहरीले जनाएको छ ।