कोहलपुर । नेकपा एमालेका महासचिव शंकर पोखरेलले व्यवसायी मीनबहादुर गुरूङबाट एमालेले पार्टी कार्यालय बनाउन जग्गा सहयोग लिएको विषय सामान्य विषय भएको बताएका छन् । बिहीबार बाँकेको कोहलपुरमा कार्यकर्ता भेलालाई सम्बोधन गर्दै महासचिव पोखरेलले मीनबहादुर गुरुङसँग जग्गा सहयोग लिँदा कुनै अदृश्य सम्झौता नगरेको दाबी गरे ।
उनले नेपाली कांग्रेले पनि मैयाँदेवी श्रेष्ठले दिएको जग्गामा घर बनाएको र राप्रपाको घर पनि दाताले दिएको चर्चा गर्दै त्यसको कुनै चर्चा हुने नगरेको बताए । राज्यले दान लिन मिल्दा पार्टीले पनि दान लिन मिल्ने तर्क गर्दै महासचिव पोखरेलले पार्टीप्रति आस्था र विश्वास रहेका र कमाएकाले पार्टीलाई दिनु सामान्य विषय भएको बताए । एमालेका पार्टी सदस्यले दिएको सहयोग पनि पार्टी कार्यालयकै काममा खर्च हुने उनले बताए । पार्टी कार्यकर्ताले गरेको सहयोग र दाताले दिएको सहयोग समेत जोडेर एमालेको सुविधा सम्पन्न अत्याधुनिक पार्टी कार्यालय बन्ने पोखरेलको भनाइ छ ।
उनले गुरुङ दम्पत्तिले एमालेलाई पार्टी कार्यालय बनाउने जग्गा दिन इच्छा जाहेर गरेको जनाउँदै उनले पार्टीको सचिवालयको बैठकले जग्गा सहयोग स्वीकार गर्ने निर्णय गरेको जानकारी दिए ।
महासचिव पोखरेलले गुरुङ जोडिएको ललिता निवास प्रकरणसँग एमालेले लिएको कीर्तिपुरको जग्गाको कुनै साइनो नभएको स्पष्ट पार्दै एमालेलाई कमजोर बनाउन चाहिने तत्त्वले जग्गा सहयोग लिएको विषयलाई अनावश्यक रूपमा गलत प्रचार गरेको जिकिर गरे ।
महासचिव पोखरेलले एमाले र कांग्रेसको उच्च नेतृत्वमा समझदारी हुँदासम्म सरकारमा कुनै समस्या नआउने बताए । एउटा निश्चित उद्देश्यका लागि वर्तमान सरकार बनेकाले कसैले चाहँदैमा सरकारमा समस्या नआउने उनको धारणा छ ।
प्रतिक्रिया