काठमाडौं । नेपाली कांग्रेसको पदाधिकारी बैठक सोमबार बस्दैछ । सभापति शेरबहादुर देउवाले सोमबार बिहान १० बजे निजी निवास बूढानीलकण्ठमा बैठक बोलाएका छन् ।
बैठकमा प्रतिनिधिसभा अन्तर्गतको राज्य व्यवस्था तथा सुशासन समिति सभापतिको उम्मेदवार र उपसभामुख इन्दिरा रानामगरमाथि छलफल हुने बताइएको छ ।
गत साउन २८ गते संघीय निजामती सेवा विधेयकमा कुलिङ पिरियड सम्बन्धी विवादमा परेका सभापति रामहरि खतिवडाले प्रतिनिधिसभा बैठकमा पदबाट राजीनामा दिएका थिए । प्रतिनिधिसभा नियमावलीको नियम १७७ को उपनियम ५ अनुसार संसदीय विषयगत समितिको सभापति पद रिक्त भएको १५ दिन भित्र निर्वाचन सम्पन्न गर्नुपर्ने प्रावधान रहेको छ ।
यसअघि कांग्रेस र एमालेले उपसभामुख रानामगरमाथि पदीय आचरण विपरीत काम गरेको आरोपमा हस्ताक्षर संकलन गरिसकेका छन् । तर, कांग्रेस भित्रै उपसभामुखविरुद्धको हस्ताक्षर संकलनलाई लिएर विवाद देखिएको छ । सभापति देउवा इतर समूहका डा. शेखर कोइराला र महामन्त्रीद्वय गगन थापा र विश्वप्रकाश शर्माले यसलाई विरोध गर्दै आएका छन् ।
प्रतिक्रिया