काठमाडौं । प्रभु साह नेतृत्वको आम जनता पार्टी (आजपा)ले दुर्गा प्रसाईंको गिरफ्तारीप्रति गम्भीर आपत्ति जनाउँदै उनलाई बिना सर्त तत्काल रिहा गर्न सरकारसँग माग गरेको छ।
निर्वाचन आयोगको सुझावअनुसार प्रसाईंलाई सोमबार साँझ भक्तपुरस्थित आफ्नै निवासबाट प्रहरीले पक्राउ गरेको बताइएको छ ।
पार्टीका प्रवक्ता चन्द्रभूषण साहले जारी गरेको विज्ञप्तिमा रातिको समयमा गरिएको पक्राउप्रति ध्यानाकर्षण भएको उल्लेख गर्दै सरकारको कदमप्रति असन्तुष्टि व्यक्त गरिएको छ। विज्ञप्तिमा सरकार आलोचक तथा फरक धारका व्यक्तिलाई निरुत्साहित गर्ने मनसायले पटक–पटक पक्राउ र रिहा गर्ने गतिविधिमा संलग्न भएको आरोप लगाइएको छ।
आजपाले यस्तो कार्य सरकारको मर्यादा र परिपक्वताविपरीत भएको दाबी गर्दै यसले विधिको शासन र लोकतन्त्रमा नकारात्मक असर पार्ने जनाएको छ। साथै मानव अधिकार, मौलिक हक, अभिव्यक्ति स्वतन्त्रता र असहमतिको अधिकारमाथि आघात पुग्ने कार्य नगर्न सरकारलाई सचेत गराइएको छ।
पार्टीले विज्ञप्तिमार्फत प्रतिशोधपूर्ण रूपमा गरिएको भन्दै प्रसाईंको गिरफ्तारी तत्काल निष्प्रभावी बनाई बिना सर्त रिहा गर्न माग गरेको छ।
प्रतिक्रिया