काठमाडौं । अमरेशकुमार सिंहले विनियोजन विधेयकको सिद्धान्त र प्राथमिकतामाथिको छलफलमा अर्थमन्त्री स्वर्णिम वाग्ले उपस्थित नभएको भन्दै प्रतिनिधिसभा बैठकमा आपत्ति जनाएका छन् ।
मंगलबार जारी प्रतिनिधिसभा बैठकमा बोल्दै राष्ट्रिय स्वतन्त्र पार्टीका सांसद सिंहले सरकारले परम्परा तोड्ने नाममा संसदीय अभ्यास कमजोर बनाउने काम गरिरहेको आरोप लगाए ।
उनले संसदीय व्यवस्थामा बजेटसम्बन्धी छलफल हुँदा अर्थमन्त्री अनिवार्य रूपमा उपस्थित हुने परम्परा रहेको उल्लेख गर्दै त्यसलाई सरकारले दृढतापूर्वक पालना गर्नुपर्ने बताए । अर्थमन्त्रीको अनुपस्थितिमा बजेट विनियोजन विधेयकमाथि छलफल सञ्चालन गर्नु संसद्को औचित्यमाथि नै प्रश्न उठाउने विषय भएको उनको भनाइ थियो ।
सांसद सिंहले “नयाँ” को नाममा सबै परम्परा भत्काउने प्रवृत्ति गलत भएको टिप्पणी गर्दै संसदीय प्रणालीको गरिमा जोगाउन सरकार जिम्मेवार हुनुपर्ने बताए । उनले आफू पाँच पटक सांसद निर्वाचित भइसकेको उल्लेख गर्दै आफ्नो संसदीय अनुभवमा अर्थमन्त्री अनुपस्थित रहेको अवस्थामा बजेटसम्बन्धी छलफल भएको पहिलो पटक देखेको बताए ।
उनले संसद् जनताका आवाज सरकारसमक्ष राख्ने थलो भएकाले संसदीय प्रक्रियालाई कमजोर बनाउने कुनै पनि कदम स्वीकार्य नहुने धारणा राखे ।
प्रतिक्रिया