बर्दिया । बर्दियाको बारबर्दिया नगरपालिकाले असोज ९ गते राती देखि १४ गते राती सम्म लकडाउनको घोषणा गरेको छ । कोरोना संक्रमणको दर बढ्दै गएपछि नगरपालिकाले लकडाउनको घोषणा गरेको हो ।
बारबर्दिया नगरपालिकाको कोभिड संकट व्यवस्थापन केन्द्रको आज बसेको बैठकले लकडाउन गर्ने निर्णय गरेको हो ।
लकडाउन अवधिभरी सरकारी तथा गैरसरकारी कार्यालय, पसल व्यवसाय, बैंक तथा वित्तिय संस्था, शैक्षिक संस्थाहरु र यातायात लगायतका क्षेत्र पुर्ण रुपमा बन्द गर्ने निर्णय गरेको छ । अत्यावश्यक सेवा प्रवाह गर्ने दैनिक उपभोग्य पसलहरु, दुध हरीयो तरकारी पानी फलफुल र ग्याँस लगाएतका पसलहरु हरेक दिन विहान ७ बजे देखि ९ बजे सम्म खुल्ला गर्ने समेत निर्णय गरेको छ ।
लकडाउनलाई प्रभावकारी बनाउनका लागि नगरपालिकाले वडाध्यक्ष र वडाघरहरुलाई समेत जानकारी गराई प्रचार प्रसार गर्ने बारबर्दिया नगरपालिकाका मेयर दुर्गा बहादुर थारुले बताए । उनले कोरोनाको जोखिम बढेको कारणले नै पुनः लकडाउन गरीएको बताए ।
त्यसैगरी नगरपालिकाले लक्षण नदेखिएका कोरोना संक्रमितहरु श्री अंशुवर्मा मावि जयनगरमा राख्ने, भारत लगायत तेस्रो मुलुकबाट आउनेलाई नेपाल सरकारले तोकेको स्वास्थ्य मापदण्ड प्रयोग गरी होम क्वारेन्टाईनमा बस्न लगाउने लगायतका निर्णय गरेको छ ।
जिल्ला प्रशासन कार्यालय बर्दियाले बारबर्दिया नगरपालिकामा असोज १० गते विहान ५ बजे देखि असोज १४ गते मध्यरात सम्म निषेधाज्ञा जारी गरेको छ । नगर स्तरी कोभिड-१९ संकट व्यवस्थापन केन्द्र बारबर्दियाको अनुरोधमा निषेधाज्ञा जारी गरीको प्रमुख जिल्ला अधिकारी लिलाधर अधिकारीले बताए ।
बारबर्दिया नगरपालिकामा हाल सम्म ६५ जना कोरोना संक्रमित फेला परेका छन् । उनीहरु मध्ये ३१ जना कोरोना जितेर घर फर्किएका छन् भने एक जनाको कोरोना कै कारण मृत्यु भएको बारबर्दिया नगरपालिका स्वास्थ्य शाखा प्रमुख डिल्लीराज शर्माले बताए ।
गत मंगलबार बारबर्दिया नगरपालिका वडा नं ३ का वडाध्यक्ष ३९ बर्षिय सुर्य बहादुर थारुको कोरोना संक्रमणको कारण मृत्यु भएको थियो ।
प्रतिक्रिया