विराटनगरमा थप एक कोरोना संक्रमितको मृत्यु

मोरङ । विराटनगरमा थप एक जना कोरोना संक्रमित पुरुषको मृत्यु भएको छ ।

विराटनगरस्थित कोशी अस्पताल कोभिड-१९ उपचार केन्द्रमा उपचाररत थप एक जना कोरोना संक्रमित पुरुषको उपचारका क्रममा मृत्यु भएको हो ।

मोरङको जहदा गाउँपालिका ६ का ६० वर्षीय पुरूष संक्रमणबाट मृत्यु भएको उपचार केन्द्रका संयोजक चिकित्सक दीपक सिग्देलले बताए ।

उनको उपचारका क्रममा बुधबार बिहान करिब ४ बजे मृत्यु भएको सिग्देलले जानकारी दिए । कोरोना पोजिटिभ भएसँगै ४ असोजमा भर्ना गरिएका बिरामीमा दीर्घ रोग मधुमेह तथा उच्च रक्तचापको समस्या थियो ।

स्वास्थ्य अवस्था गम्भीर हुँदै गएपछि ६ असोजको राति पौने ८ बजेदेखि भेन्टिलेटरमा राखेर उपचार सुरु गरिएको गरिएको थियो । यस क्रममा बिरामीमा रेमडेसिभर औषधि समेत चलाउँदै आएको थियो ।

योसँगै प्रदेश १ मा कोरोना संक्रमणबाट ६८ जनाको मृत्यु भएको छ ।